(24 نیوز)انٹرنیشنل کرکٹ کونسل (آئی سی سی) نے ٹی 20 ورلڈ کپ میں بنگلہ دیش کے میچز کیلئے بھارت ہی میں دو وینیو تجویز کرنے کا پلان تیار کرلیا۔
بھارتی میڈیا کے مطابق آئی سی سی رواں ہفتے پیر یا منگل کو بنگلہ دیش کرکٹ بورڈ (بی سی بی) کی درخواست پر جواب دے گا۔
درخواست میں بنگلہ دیش نے اپنے ٹی 20 ورلڈ کپ 2026 کے میچز بھارت سے منتقل کرنے کا مطالبہ کیا ہے۔
بی سی بی نے سکیورٹی خدشات کا حوالہ دیتے ہوئے آئی سی سی سے باضابطہ طور پر درخواست کی تھی کہ بنگلہ دیش کے میچز بھارت کے بجائے سری لنکا میں کرائے جائیں۔
یہ درخواست اس وقت سامنے آئی جب بنگلہ دیش کے فاسٹ بولر مستفیض الرحمان کو بھارتی بورڈ (بی سی سی آئی) کی ہدایت پر آئی پی ایل فرنچائز کولکتہ نائٹ رائیڈرز نے ریلیز کردیا تھا۔
مزید پڑھیں:ٹی20 ورلڈ کپ؛قومی سکواڈ کے ممکنہ کھلاڑیوں کے نام سامنے آگئے
رپورٹس کے مطابق آئی سی سی بنگلہ دیش کی میچز سری لنکا منتقل کرنے کی درخواست قبول کرنے کے موڈ میں نہیں ہے۔
سری لنکا کے بجائے چنئی اور ترواننت پورم کو متبادل وینیوز کے طور پر تجویز کرنے پر غور کیا جا رہا ہے۔
یاد رہے کہ بنگلہ دیش کے گروپ مرحلے کے میچز اس وقت کولکتہ اور ممبئی میں شیڈول ہیں، اس سے قبل بنگلہ دیش نے چنئی کو بطور وینیو قبول کرنے سے انکار کیا تھا۔
دوسری جانب بنگلہ دیشی حکومت نے بھی سیکیورٹی خدشات کے حوالے سے بھارتی حکومت سے براہِ راست رابطے کی توقع ظاہر کی ہے۔
بی سی بی کا مؤقف ہے کہ جب تک سیکیورٹی سے متعلق مکمل یقین دہانی نہیں کرائی جاتی وہ اپنی ٹیم کو بھارت بھیجنے پر مطمئن نہیں ہوں گے۔
Leave a Reply