(24 نیوز)آسٹریلیا کے مایہ ناز فاسٹ باؤلر مچل سٹارک کو دسمبر 2025 کے لیے آئی سی سی مینز پلیئر آف دی منتھ منتخب کر لیا گیا ہے۔
یہ اعزاز انہیں ایشز سیریز میں شاندار آل راؤنڈ کارکردگی اور میچ وننگ پرفارمنس کے اعتراف میں دیا گیا۔
دبئی میں آئی سی سی کی جانب سے جاری بیان کے مطابق مچل سٹارک نے ویسٹ انڈیز کے بیٹر جسٹن گریوز اور نیوزی لینڈ کے فاسٹ بولر جیکب ڈفی کو پیچھے چھوڑتے ہوئے یہ اعزاز حاصل کیا۔
ایشز سیریز میں سٹارک نے ابتدا ہی میں پرتھ ٹیسٹ میں 10 وکٹیں حاصل کر کے سیریز کا رخ آسٹریلیا کے حق میں موڑ دیا، جبکہ برسبین ٹیسٹ میں مزید 8 وکٹیں لے کر اپنی برتری برقرار رکھی۔
دسمبر کے دوران انہوں نے ایڈیلیڈ اور میلبورن ٹیسٹ میں بھی چار، چار وکٹیں حاصل کیں اور یوں مہینے کے اختتام تک 16 وکٹیں اپنے نام کیں۔
سٹارک نے بیٹنگ میں بھی اہم کردار ادا کیا اور برسبین و ایڈیلیڈ میں نصف سنچریاں سکور کر کے نچلے نمبر پر قیمتی رنز فراہم کیے۔
مزید پڑھیں:سوئیڈن: فٹبال کے شوقین نے انوکھا ریکارڈ بنا ڈالا
جس کی بدولت آسٹریلیا نے 5 ٹیسٹ میچوں کی سیریز میں ناقابلِ شکست 3-0 برتری حاصل کی۔
ایشز سیریز میں آسٹریلیا نے مجموعی طور پر 4-1 سے کامیابی حاصل کی، جبکہ مچل سٹارک 31 وکٹوں کے ساتھ سیریز کے سب سے کامیاب باؤلر رہے اور پلیئر آف دی سیریز کا اعزاز بھی اپنے نام کیا۔
اعزاز حاصل کرنے پر مچل سٹارک نے کہا کہ ہوم گراؤنڈ پر ایشز جیسی تاریخی سیریز جیتنے کے بعد یہ اعزاز ملنا ان کے لیے باعثِ فخر ہے۔
انہوں نے مزید کہا کہ آسٹریلین ٹیم آئندہ ورلڈ ٹیسٹ چیمپیئن شپ فائنل کے لیے اسی رفتار کو برقرار رکھنے کی کوشش کرے گی۔
Leave a Reply