پنجاب بھر کے سرکاری سکولوں کے نئے اوقاتِ کار کا نوٹیفکیشن جاری کردیا گیا ہے جو 19 جنوری سے 15 اپریل 2026 تک لاگو ہوں گے۔
محکمہ سکول ایجوکیشن پنجاب کے نوٹیفکیشن کے مطابق سنگل شفٹ سکولوں میں طلبہ کے لئے پیرتا جمعرات صبح 10 بجے سے دو بج کر 15 منٹ تک تدریسی اوقات ہوں گے جبکہ جمعہ کے روز کلاسز صبح 10 بجے سے 12 بج کر30 منٹ تک جاری رہیں گی۔
ڈبل شفٹ سکولوں کے لیے مارننگ شفٹ صبح 10 بجے سے 2 بجے تک اورآفٹر نون شفٹ 2 بج کر 15 منٹ سے 4 بج کر 45 منٹ تک مقررکی گئی ہے۔
اساتذہ کے لیے پیر تا جمعرات کے اوقات میں نصابی تیاری، تربیتی سرگرمیاں اور سی پی ڈی کی شمولیت شامل ہے اور نوٹیفکیشن میں واضح کیا گیا ہے کہ اساتذہ کو تربیت اور نصابی سرگرمیوں میں حصہ لینا لازمی ہوگا۔
مزید برآں اساتذہ کی حاضری متبادل ہفتہ (Alternate Saturday) پر بھی لازمی ہوگی تاکہ تدریسی اور نصابی معیار میں بہتری لائی جا سکے۔
محکمہ سکول ایجوکیشن کا کہنا ہے کہ نئے اوقاتِ کار کا مقصد نہ صرف طلبہ کی تعلیمی سرگرمیوں کو مؤثراور متوازن بنانا ہے بلکہ اساتذہ کو نصابی تیاری اورتربیت کے مواقع فراہم کرنا بھی ہے اس اقدام کے ذریعے تعلیمی معیار کو بلند کرنے اورطلبہ کی استعداد بڑھانے میں مدد ملے گی۔
محکمہ نے اس بات پر زور دیا کہ اساتذہ اور طلبہ دونوں نئے اوقاتِ کار کے تحت اپنی ذمہ داریوں کو پوری سنجیدگی سے ادا کریں تاکہ تعلیمی معیار اور کلاس روم میں کارکردگی بہتر بنائی جا سکے۔
Leave a Reply