(ویب ڈیسک ) سعودی عرب میں ڈاکار ریلی 2026 کے 13ویں اور آخری مرحلے کے اختتام پر قطری ڈرائیور ناصر العطیہ نے چھٹی مرتبہ ٹائٹل جیت لیا۔
بیلجیئم کے شریک ڈرائیور فیبیان لورکین کے ساتھ ڈرائیونگ کرتے ہوئے ناصر العطیہ 48 گھنٹے 56 منٹ اور 53 سیکنڈ کے مجموعی وقت کے ساتھ ڈاکار ریلی کی مجموعی سٹینڈنگ میں سرفہرست رہے، فورڈ کے سپینش ڈرائیور نانی روما 9 منٹ 42 سیکنڈ سے پیچھے رہے جبکہ سویڈش میتھاس ایکستروم نے 14 منٹ 33 سیکنڈ کے فرق سے تیسری پوزیشن حاصل کی۔
فرانس کے سیبا سٹین لوب 15 منٹ اور 10 سیکنڈ کے فرق سے چوتھے، سپین کے کارلوس سینز 28 منٹ اور 30 سیکنڈ کے فرق سے پانچویں نمبر پر رہے،ناصر العطیہ نے ٹائٹل جیتنے پر خوشی کا اظہار کیا تاہم انہوں نے کہا کہ’ وہ فرنچ ڈرائیور سٹیفن پیٹر ہینسل کے آٹھ ٹائٹلز کا ریکارڈ توڑنا چاہتے ہیں۔‘
ناصر العطیہ نے چھٹی مرتبہ یہ ٹائٹل حاصل کیا ہے، اب وہ سٹیفن پیٹر ہینسل کے قائم کردہ ریکارڈ کے قریب پہنچ گئے جنہوں نے 2004 سے 2021 کے درمیان آٹھ مرتبہ یہ ٹائٹل جیتا ہے۔
یاد رہے ڈاکار ریلی 2026 کے جغرافیائی تنوع اور ایڈونیچر سے بھرپور سفر کا آغاز بحیرۂ احمر کے ساحل پر واقع ینبع سے ہوا تھا،سعودی عرب نے ساتویں مرتبہ ریلی کی میزبانی کی۔
اس ریلی کا انعقاد وزارتِ سپورٹس کی نگرانی میں سعودی آٹوموبائل اینڈ موٹر سائیکل فیڈریشن کے اشتراک سے کیا گیا اور اس کی مارکیٹنگ سعودی موٹر سپورٹس کمپنی کرتی ہے۔
ڈاکار ریلی، العلا، حائل، ریاض، وادی الدوسر، بیشہ، اور الحناکیہ سے گزرتی ہوئی سنیچر 17 جنوری کو ینبع میں اختتام پذیر ہوئی۔
اس ریلی میں سعودی شرکا کی قیادت گزشتہ ایڈیشن کے چیمپئن یزید الراجحی کر رہے تھے جو تیکنیکی وجوہ پر ریلی کے درمیان میں ہی دستبردار ہوگئے۔
یہ بھی پڑھیں : بالی ووڈ میں کب سے کام نہیں مل رہا؟ وجہ کیا ہے؛گلوکار اے آر رحمٰن نے سب کچھ بتا دیا
Leave a Reply