(24 نیوز)پاکستان انڈر19 نے سمیر منہاس کی نصف سنچری اور عمرزیب کی 5وکٹوں کی عمدہ کارکردگی کے نتیجے میں افغانستان انڈر 19 کو سہ ملکی ون ڈے سیریز کے اہم میچ میں 133 رنز سے شکست دے کر فائنل میں جگہ بنالی۔
سہ فریقی سیریز کا فیصلہ کن میچ 6 جنوری کو زمبابوے انڈر 19 کے خلاف کھیلا جائے گا ، اس سے قبل پاکستان ٹیم اتوار کو اپنا آخری لیگ میچ زمبابوے انڈر 19 کے خلاف کھیلے گی۔
اس سیریز میں یہ پاکستان انڈر 19 کی دوسری کامیابی ہے، اس سے قبل اس نے افغانستان ہی کے خلاف میچ دلچسپ مقابلے کے بعد ایک وکٹ سے جیتا تھا جبکہ زمبابوے کے خلاف اس کا میچ بارش کی نذر ہوگیا تھا۔
جمعہ کے روز سن رائز سپورٹس کلب میں کھیلے گئے میچ میں پاکستان نے ٹاس جیت کر پہلے بیٹنگ کی اور50 اوورز میں 9 وکٹوں پر 238 رنز بنائے ، افغانستان کی ٹیم جواب میں 30 اعشاریہ 2 اوورز میں 105 رنز بناکر آؤٹ ہوگئی۔
پاکستان کی اننگز میں سمیر منہاس نے 6 چوکوں اور ایک چھکے کی مدد سے 56 رنز سکور کیے،عثمان خان نے 43 اور علی حسن بلوچ نے 39 رنز کی اننگز کھیلی، ایک موقع پر پاکستان کا سکور 2 وکٹوں پر 166 رنز تھا تاہم آخری 7 وکٹیں سکور میں 63 رنز کا اضافہ کرکے گرگئیں۔
افغانستان کی طرف سے سلمان خان احمد زئی اور زیت اللہ شاہین نے 2-2 وکٹیں حاصل کیں، افغانستان کی اننگز میں کپتان محبوب خان 29 رنز کے ساتھ ٹاپ سکورر رہے۔
فاسٹ بائولر عمر زیب نے عمدہ باولنگ کرتے ہوئے 31 رنز دے کر 5 وکٹیں حاصل کیں،مومن قمر اور احمد حسین نے 2-2 وکٹیں حاصل کی ہیں۔
یہ بھی پڑھیں :لینڈ ریونیو سروس کے چار افسران کےتقرر و تبادلے
Leave a Reply