آئی سی سی مینز ٹی ٹوئنٹی ورلڈ کپ کے سُپر 8 مرحلے میں جنوبی افریقا کے ہاتھوں 76 رنز کی بڑی شکست کے بعد بھارت کرکٹ ٹیم کے سیمی فائنل تک رسائی کے امکانات خطرے میں پڑ گئے ہیں۔
سُپر 8 کے گروپ 1 کے میچ میں جنوبی افریقا کے 188 رنز کے ہدف کے تعاقب میں بھارتی ٹیم 111 رنز پر ڈھیر ہوگئی۔
یہ رنز کے اعتبار سے ٹی ٹوئنٹی ورلڈکپ میں بھارت کی سب سے بڑی شکست قرار دی جا رہی ہے۔ اس سے قبل 2010 کے ورلڈکپ میں بھارت کو آسٹریلیا کے ہاتھوں 49 رنز سے شکست ہوئی تھی۔
نیٹ رن ریٹ بری طرح متاثر
اس عبرتناک شکست کے بعد بھارت کا نیٹ رن ریٹ منفی 3 تک گر گیا ہے، جس نے سیمی فائنل کی دوڑ مزید پیچیدہ بنا دی ہے۔
گروپ 1 میں بھارت کے ساتھ جنوبی افریقا، ویسٹ انڈیز اور زمبابوے شامل ہیں، جہاں ٹاپ 2 ٹیمیں سیمی فائنل کے لیے کوالیفائی کریں گی۔
بھارت کے لیے ممکنہ راستہ
بھارت کو اب اپنے باقی دونوں میچز (زمبابوے اور ویسٹ انڈیز کے خلاف) بڑے مارجن سے جیتنا ہوگا۔ اس کے ساتھ ساتھ دیگر ٹیموں کے نتائج بھی فیصلہ کن کردار ادا کریں گے۔
ممکنہ منظرنامے کے مطابق اگر:
ویسٹ انڈیز جنوبی افریقا کو شکست دے
زمبابوے اپنے تمام میچز ہار جائے
بھارت اپنے دونوں میچز جیت لے
تو تین ٹیمیں 4، 4 پوائنٹس کے ساتھ برابر ہو سکتی ہیں۔ ایسی صورت میں فیصلہ نیٹ رن ریٹ کی بنیاد پر ہوگا، جہاں بھارت کی موجودہ پوزیشن کمزور دکھائی دے رہی ہے۔
شدید تنقید کا سامنا
جنوبی افریقا کے خلاف بھاری شکست کے بعد بھارتی ٹیم کو شدید تنقید کا سامنا ہے اور کرکٹ ماہرین ٹیم کے کمبی نیشن اور حکمت عملی پر سوالات اٹھا رہے ہیں۔
واضح ہے کہ اب بھارت کے لیے صرف جیت کافی نہیں بلکہ بڑے مارجن سے کامیابی ناگزیر ہو چکی ہے۔
Leave a Reply