(ویب ڈیسک ) پاکستان کرکٹ ٹیم کے وکٹ کیپر بیٹر عثمان خان کا کہنا ہے کہ ہیڈ کوچ مائیک ہیسن کی زیرِ نگرانی شاندار تیاری کی بدولت پاکستان کے پاس ٹی ٹونٹی ورلڈ کپ 2026 جیتنے کا بہترین موقع ہے۔
عثمان خان نے بنگلا دیش پریمیئر لیگ (بی پی ایل) کے دوران گفتگو کرتے ہوئے کہا کہ ہمارے کوچ مائیک ہیسن نے ورلڈ کپ سے قبل ہماری بہت اچھی تیاری کروائی ہے، ہم اگلے ماہ مزید تیاری کے سلسلے میں سری لنکا اور آسٹریلیا کے خلاف میچز کھیلیں گے،ٹیم کا کمبینیشن بہترین ہے اور ہم پُراعتماد ہیں۔
بنگلادیش پریمیئر لیگ میں ڈھاکا کیپٹلز کی نمائندگی کرنے والے عثمان خان نے کہا کہ ہیڈ کوچ مائیک ہیسن کی زیرِ نگرانی شاندار تیاری کی بدولت پاکستان کا ٹی ٹونٹی ورلڈ کپ 2026 جیتنے کا بہترین چانس ہے۔
یہ بھی پڑھیں:موٹروے پر سفرکرنے والوں کیلئے اہم خبر
30 سالہ وکٹ کیپر بیٹر عثمان خان3 ٹی ٹونٹی میچوں کی سیریز کے لیے 7 جنوری سے سری لنکا کے شہر دمبولا میں پاکستان ٹیم کو جوائن کریں گے۔
عثمان خان نے کہا کہ میں پہلی بار سری لنکا جا رہا ہوں، دمبولا میں کھیلنا ہمیں ورلڈ کپ سے قبل پچز کو سمجھنے کا اچھا موقع دے گا، فاسٹ بولنگ کے خلاف بہتر کھیلنے پر توجہ دے رہا ہوں اور ہماری کوشش سری لنکا میں سیریز جیتنے کی ہے۔
انہوں نے مزید کہا کہ بنگلا دیش میں کھیلنے سے مختلف کنڈیشنز میں ایڈجسٹ ہونے میں مدد ملتی ہے۔
عثمان خان نے مزید کہا کہ میں نے یو اے ای کے لیے بھی کھیلا لیکن پاکستان میری پہلی ترجیح ہے، پاکستان میرا ملک ہے اور یہی میرے لوگ ہیں، میں اللہ کا شکر ادا کرتا ہوں کہ مجھے پاکستان کے لیے کھیلنے کا موقع ملا۔
واضح رہے کہ آئی سی سی ٹی ٹونٹی ورلڈکپ 7 فروری سے بھارت میں شروع ہوگا، پاکستان اپنے تمام میچز سری لنکا میں کھیلے گا۔
Leave a Reply